Basma

قصة بسمة من الواقع… منقولة لي من أطراف صديقة مع تغييرات بسيطة مني حفاظا على خصوصية أصحاب القصة

**********

بسمة بنت كويتية من عايلة معروفة… بنت عبدالله و بنت باسمة… إي تقدرون تقولون الأبو سمى بسمة على أمها لأن يحبها وايد… و عندها أختين توم أصغر منها: هيا و مها

 

جد بسمة بابا أحمد متزوج ثلاث… ماما حصة ما يابت له عيال و هي اللي خطبت له ماما هيا اللي هي جدة بسمة و عيالها عبدالله و عبداللطيف و لطيفة. توفت ماما هيا قبل ولادة هيا و مها… و ماما نورية آخر زوجة لبابا أحمد و عيالها هند و خالد… خالد أصغر عمام بسمة و أكبر منها بست سنين

 

اشتغلت بسمة في بداياتها بأحد البنوك مع صديقتها و اللي تعدها أخت دنيا نور. بسمة كان متقدم لها جاسم… موظف يشتغل معاهم بالبنك و يصير حق النسرة لميس مرت عمها عبداللطيف بس لأسباب عدم التوافق الفكري بينهم قررت بسمة تفل الموضوع من أوله

 

المهم و عقب خمس سنوات بالبنك قررت بسمة تستقيل مع نور و افتحوا مركز تجميلي\صالون مع نادي صحي بنفس البناية اللي يملك فيها سليمان أبو نور عيادته الخاصة

 

البيت العود… بيت بابا أحمد بالنزهة و تسكن معاه ماما حصة بالدور الأرضي و ماما نورية بالدور الأول مكان ماما هيا الله يرحمها مع خالد. خالد توه خاطب و قاعدين يجهزون له الدور الثاني في نفس البيت

 

الإخوان عبدلله و عبداللطيف بنفس الفريج… أختهم لطيفة متزوجة أخو باسمة حمد و ساكنة بالضاحية… أدري شرباكة بس ركزوا معاي بالبداية و مع الوقت بتعرفون العايلة أكثر

 

هند متزوجة وليد أخو سليمان أبو نور… عقدتكم عدل؟

 

سويت لكم رسمة توضيحية

كل أثنين يتجمعون في بيت بابا أحمد من المغرب لي العشا… كانت هذي جمعتهم المقدسة و اللي ما ايي… يا ويله من ماما حصة! صج إن ماما حصة ما يابت عيال بس كانت هي أم الكل و عبداللطيف سمى بنته الثانية عليها

 

بسمة طلعت مبجر يوم الأثنين و شافت نفسها فاضية من العصر و قالت ليش ما أروح بيت يدي مبجر منها أشوفهم و منها أشوف البنيان اللي عندهم… أروح أشوف عمي خالد وين وصل بجناحه. و هي تسفط السيارة دقت عليها أمها

 

باسمة: طلعتي من الصالون؟

بسمة: إي يمه… توني وصلت بيت بابا أحمد

باسمة: تو الناس… ليش رايحة مبجر

بسمة: بشوف جناح عمي خالد… بشوف وين وصلوا بالبنيان

باسمة: عن اللقافة!!! إذا عمج ما طلب منج لا تفرضين نفسج! يمكن ما يبي

بسمة: يممممه… من صجج؟ أصلا ياخذ ذوقي بكل شي و أنا اللي ساعدته بتصميم غرفة الملابس كان مسويها مترين بثلاث… خليته يكبرها خمس أمتار بستة عشان تستانس عالية

باسمة: و الله مادري عنكم بس كنت ابيج بموضوع… خليها عقب العشا

بسمة: شنووووو يمه؟؟؟ تبين أيي؟؟؟

باسمة: آخ منج بس… لا لا… لا تيين بعدين أقول لج

بسمة: لا قولي يمه قولي

باسمة: زين زين… داقة علي سارة بنت خالي تقول تبي تخطبج حق ولدها علي

بسمة: هاو! علي مو متزوج أمريكية؟؟؟ و لا أنا مضيعة

باسمة: بيه مطلقها من سنتين و ردت ديرتها

بسمة: لا يمه مابيه

باسمة: يالمينونة! علي مزيون و مهندس قد الدنيا

بسمة: مادري يمه ما أحس تايبي و عنده عيال… لا لا اعتذري من خالتي سارة

باسمة: أنا بقعد معاج الليلة و بكلمج بالموضوع أكثر

بسمة: إن شاء الله بس ما راح أغير رايي

باسمة: زين يصير خير… باي

بسمة: اممممواه… باي مااامي

 

 

بسمة ما قدرت تدش بيت يدها و راحت البيت! شافت أمها و عشان ما تسوي سالفة طلبت منها تعطيها يومين تفكر! طبعا هي رافضة الفكرة بكبرها بس ما كانت تبي تعكر مزاجها و مزاج أمها باليمعة

 

خلصت اليمعة و ردت البيت تفكر شتسوي… مو قادرة تنام! قضبت الموبايل و دزت مسج حق نور

 

يتبع…..

This entry was posted in General and tagged . Bookmark the permalink.

2 Responses to Basma

  1. anonymous says:

    oo ba3dain!!?
    Yalla part II

    I miss blog posts like these

Leave a Reply

Your email address will not be published. Required fields are marked *